បណ្ឌិត ឥន សុផល វាយបកទៅកាសែតថៃ ខាវសតថា ព្រឹត្តិការណ៍នៅ “ភ្នំខ្មោច” ជាការពិតប្រវត្តិសាស្ត្រដ៏ខ្លោចផ្សា មិនមែនជារឿងប្រឌិតឡើយ

ភ្នំពេញ៖ លោកបណ្ឌិត ឥន សុផល អ្នកស្រាវជ្រាវប្រវត្តិសាស្ត្រដ៏ល្បីល្បាញ បានចេញមុខប្រតិកម្មយ៉ាងខ្លាំងក្លា និងផ្ដល់ភស្តុតាងជាប្រវត្តិសាស្ត្រមិនអាចប្រកែកបាន ដើម្បីឆ្លើយតបទៅនឹងសារព័ត៌មានថៃ “ខាវសត” (Khao Sod) ដែលបានចុះផ្សាយថា រឿងរ៉ាវនៅ “ភ្នំខ្មោច” គឺជាការប្រឌិត។

The latter about the GHOST MOUNTAIN

លោកបណ្ឌិតបានបញ្ជាក់ថា ព្រឹត្តិការណ៍ដែលទាហានថៃធ្វើបាប និងប្រល័យពូជសាសន៍លើជនភៀសខ្លួនខ្មែរនៅតំបន់ភ្នំខ្មោច ក្បែរប្រាសាទព្រះវិហារ កាលពីឆ្នាំ១៩៧៩ គឺជាការពិតជាក់ស្ដែងដែលមានឯកសារអន្តរជាតិបញ្ជាក់យ៉ាងច្បាស់លាស់។ លោកបានលើកឡើងនូវចំណុចសំខាន់ៗចំនួន ៧ ដើម្បីជាការតបត៖

១. ភស្តុតាងអន្តរជាតិ៖ ព្រឹត្តិការណ៍នេះទើបតែបានកន្លងផុតទៅនៅឆ្នាំ១៩៧៩ប៉ុណ្ណោះ ហើយលោកមានឯកសារអន្តរជាតិពេញក្នុងដៃដែលកំពុងប្រើប្រាស់សម្រាប់សរសេរសៀវភៅ ដែលមានខ្លឹមសារច្បាស់លាស់ជាងសាច់រឿងក្នុងភាពយន្តខ្លីទៅទៀត។ លោកបញ្ជាក់ថា ចន្លោះពីថ្ងៃទី៨ ដល់ថ្ងៃទី១៣ ខែមិថុនា ឆ្នាំ១៩៧៩ មានជនភៀសខ្លួនខ្មែរចន្លោះពី ៤០,០០០ ទៅ ៥០,០០០ នាក់ ត្រូវបានថៃបញ្ជូនត្រឡប់មកវិញដោយបង្ខំ។

២. កំណត់ត្រារបស់កាកបាតក្រហមអន្តរជាតិ (ICRC)៖ លិខិតចុះថ្ងៃទី២៩ ខែមិថុនា ឆ្នាំ១៩៧៩ ផ្ញើទៅកាន់ទីក្រុងហ្សឺណែវ បានរាយការណ៍ថា ទាហានថៃបានបង្ខំឱ្យជនភៀសខ្លួនខ្មែរដើរកាត់ចម្ការមីន និងបានបាញ់សម្លាប់មនុស្សអស់ជាង ៤០,០០០ នាក់។

៣. សក្ខីកម្មរបស់អ្នកកាសែតអង់គ្លេស៖ លោក William Shawcross បានបញ្ជាក់ថា ជនភៀសខ្លួនប្រហែល ៥០,០០០ នាក់ ត្រូវបានទាហានថៃភ្ជង់កាំភ្លើងបណ្ដេញចេញ និងបាញ់ទម្លាក់ពីលើច្រាំងថ្មចោតឱ្យដើរកាត់ចម្ការមីនដោយគ្មានអាហារ និងទឹក។ អ្នកដែលព្យាយាមដើរថយក្រោយ ត្រូវបានទាហានថៃបាញ់សម្លាប់រាប់ពាន់នាក់។

៤. របាយការណ៍ឯកអគ្គរដ្ឋទូតអាមេរិក៖ លោក Morton Abramowitz បានផ្សព្វផ្សាយលិខិតរបស់ជនរងគ្រោះ ដែលបញ្ជាក់ថាមានអ្នកនៅរស់រានមានជីវិតប្រហែលតែ ១,០០០ នាក់ប៉ុណ្ណោះនៅជើងភ្នំ ដែលស្ថិតក្នុងស្ថានភាពឈឺធ្ងន់ និងដាច់បាយដាច់ទឹកអស់រយៈពេលជាង ១០ ថ្ងៃ។

៥. តួលេខពីមន្ត្រីអង្គការសហប្រជាជាតិ (UNHCR)៖ លោកស្រី Yvette Pierpaoli ដែលបានចុះជួយសង្គ្រោះផ្ទាល់ បានបញ្ជាក់ថាមានអ្នកនៅរស់ដែលលោកស្រីជួយបានតែ ៩២២ នាក់ប៉ុណ្ណោះ។

៦. ការជួយសង្គ្រោះពីកងទ័ពវៀតណាម៖ កងទ័ពវៀតណាមដែលបានចូលទៅជួយក្នុងចម្ការមីន បានបញ្ជាក់ថាពួកគេជួយមនុស្សបានចន្លោះពី ២,០០០ ទៅ ៣,០០០ នាក់។

៧. សរុបចំនួនអ្នកស្លាប់៖ ក្នុងចំណោមមនុស្សជិត ៥០,០០០ នាក់ ដែលថៃបញ្ជូនមក មានអ្នកនៅរស់រានមានជីវិតត្រឹមតែជាង ៤,០០០ នាក់ប៉ុណ្ណោះ។ លោកបណ្ឌិតបន្ថែមថា បើរាប់បញ្ចូលទាំងការបញ្ជូនមកសម្លាប់ជាច្រើនលើកច្រើនសារតាំងពីខែមេសា ឆ្នាំ១៩៧៩ ចំនួនជនជាតិខ្មែរដែលស្លាប់នៅទីនោះអាចមានរហូតដល់ជិត ១០ ម៉ឺននាក់។

ជាចុងក្រោយ លោកបណ្ឌិត ឥន សុផល បានលាតត្រដាងពីមូលហេតុនៅពីក្រោយអំពើឃោរឃៅនេះថា គឺជា “គំនុំសងសឹក” របស់ភាគីថៃ ដែលឈឺចាប់ពីការចាញ់ក្ដីប្រាសាទព្រះវិហារនៅតុលាការអន្តរជាតិកាលពីឆ្នាំ១៩៦២។ លោកថា ទាហានថៃថែមទាំងបាននិយាយថា ការសម្លាប់ជនភៀសខ្លួនខ្មែរនៅទីនេះ គឺជាការសងគំនុំឈាមដែលជនជាតិថៃធ្លាប់ឈឺចាប់កន្លងមក។

ការបកស្រាយរបស់លោកបណ្ឌិត គឺជាការទាត់ចោលទាំងស្រុងនូវការចុះផ្សាយរបស់សារព័ត៌មានថៃ ដែលព្យាយាមបំភ័ន្តការពិតនៃប្រវត្តិសាស្ត្រដ៏ជូរចត់របស់ប្រជាជនកម្ពុជា។