តម្លៃប្រេងហក់ឡើងវិញ ខណៈច្រកសមុទ្រ Hormuz ត្រូវបានបិទជាថ្មី

ថ្ងៃទី២០ ខែមេសា ឆ្នាំ២០២៦ ម៉ោង ៥:១០ ព្រឹក GMT+7

សិង្ហបុរី, ២០ មេសា (Reuters) - តម្លៃប្រេងបានស្ទុះងើបឡើងវិញជាង ៦% នៅថ្ងៃចន្ទ បន្ទាប់ពីបានធ្លាក់ចុះយ៉ាងគំហុកជាង ៩% កាលពីថ្ងៃសុក្រ ក្រោយពីមានព័ត៌មានថា ច្រកសមុទ្រ Hormuz ត្រូវបានបិទជាថ្មី បន្ទាប់ពីទាំងសហរដ្ឋអាមេរិក និងអ៊ីរ៉ង់ បានចោទប្រកាន់គ្នាទៅវិញទៅមកថា បានរំលោភលើកិច្ចព្រមព្រៀងឈប់បាញ់ តាមរយៈការវាយប្រហារលើនាវាកាលពីចុងសប្តាហ៍។

តម្លៃប្រេងឆៅ Brent (Brent crude futures) បានហក់ឡើង ៦,១១ ដុល្លារ ឬ ៦,៧៦% ដល់ ៩៦,៤៩ ដុល្លារក្នុងមួយបារ៉ែល គិតត្រឹមម៉ោង ២៣:២៧ GMT ហើយតម្លៃប្រេងឆៅ West Texas Intermediate (WTI) របស់សហរដ្ឋអាមេរិកមានតម្លៃ ៩០,៣៨ ដុល្លារក្នុងមួយបារ៉ែល ពោលគឺកើនឡើង ៦,៥៣ ដុល្លារ ឬ ៧,៧៩%។

កាលពីថ្ងៃអាទិត្យ ប្រធានាធិបតីអាមេរិក លោក ដូណាល់ ត្រាំ បានមានប្រសាសន៍ថា យោធាសហរដ្ឋអាមេរិកបានចាប់យកនាវាដឹកទំនិញរបស់អ៊ីរ៉ង់មួយគ្រឿង ដែលបានព្យាយាមបំពានការបិទខ្ទប់របស់ខ្លួន ខណៈដែលអ៊ីរ៉ង់បាននិយាយថា ខ្លួននឹងមិនចូលរួមក្នុងកិច្ចពិភាក្សាសន្តិភាពជុំទីពីរឡើយ បើទោះបីជាមានការគំរាមកំហែងពីលោក ត្រាំ ក្នុងការវាយប្រហារតាមអាកាសជាថ្មីក៏ដោយ។

សហរដ្ឋអាមេរិកបានបន្តការបិទខ្ទប់កំពង់ផែអ៊ីរ៉ង់ ខណៈដែលអ៊ីរ៉ង់បានដកចេញ ហើយបន្ទាប់មកបានដាក់ការបិទខ្ទប់ច្រកសមុទ្រ Hormuz ជាថ្មីឡើងវិញ ដែលច្រកនេះធ្លាប់ទទួលបន្ទុកដឹកជញ្ជូនប្រេងប្រហែលមួយភាគប្រាំនៃការផ្គត់ផ្គង់ប្រេងពិភពលោក មុនពេលសង្រ្គាមបានចាប់ផ្តើមកាលពីជិតពីរខែមុន។

លោក Saul Kavonic ប្រធានផ្នែកស្រាវជ្រាវរបស់ MST Marquee បានលើកឡើងថា៖ «ទីផ្សារប្រេងបន្តមានភាពរង្គោះរង្គើ ដោយសារការបង្ហោះសារចុះឡើងនៅលើបណ្តាញសង្គមដោយសហរដ្ឋអាមេរិក និងអ៊ីរ៉ង់ ជាជាងស្ថានភាពជាក់ស្តែងនៅលើដី ដែលនៅតែមានការពិបាកសម្រាប់លំហូរប្រេងក្នុងការងើបឡើងវិញយ៉ាងឆាប់រហ័ស»។

កិច្ចសន្យាប្រេងទាំងពីរប្រភេទបានកត់ត្រាការធ្លាក់ចុះប្រចាំថ្ងៃដ៏ធំបំផុតរបស់ពួកគេកាលពីថ្ងៃសុក្រ ចាប់តាំងពីថ្ងៃទី ១៨ ខែមេសា បន្ទាប់ពីអ៊ីរ៉ង់បាននិយាយថា ការឆ្លងកាត់សម្រាប់នាវាពាណិជ្ជកម្មទាំងអស់តាមច្រកសមុទ្រ Hormuz ត្រូវបានបើកសម្រាប់រយៈពេលឈប់បាញ់ដែលនៅសល់ ហើយលោក ត្រាំ បាននិយាយថា អ៊ីរ៉ង់បានយល់ព្រមមិនបិទច្រកសមុទ្រនេះម្តងទៀតឡើយ។

លោក Kavonic បានបន្តថា៖ «ការប្រកាសអំពីការបើកច្រកសមុទ្រនេះ ហាក់ដូចជាលឿនពេក។ ម្ចាស់នាវានឹងមានការរារែក និងប្រុងប្រយ័ត្នទ្វេដងក្នុងការធ្វើដំណើរឆ្ពោះទៅកាន់ច្រកសមុទ្រនោះម្តងទៀត បើមិនមានទំនុកចិត្តច្បាស់លាស់ថា ការឆ្លងកាត់ដែលបានប្រកាសនោះគឺជាការពិត»។

ទិន្នន័យពី Kpler បានបង្ហាញថា នាវាជាង ២០ គ្រឿងបានឆ្លងកាត់ច្រកសមុទ្រកាលពីថ្ងៃសៅរ៍ ដោយដឹកដឹកជញ្ជូនប្រេង ឧស្ម័នឥន្ធនៈរាវ (LPG) លោហធាតុ និងជី ដែលជាចំនួននាវាឆ្លងកាត់ផ្លូវទឹកនេះខ្ពស់បំផុត ចាប់តាំងពីថ្ងៃទី ១ ខែមីនាមក។

យោងតាមរដ្ឋមន្ត្រីក្រសួងថាមពលសហរដ្ឋអាមេរិក លោក Chris Wright បានប្រាប់ CNN កាលពីថ្ងៃអាទិត្យថា លោកជឿជាក់ថា តម្លៃប្រេងបានឡើងដល់ចំណុចកំពូលហើយ។

ប្រភព៖ សារព័ត៌មាន Reuters

https://www.reuters.com/business/energy/oil-prices-rebound-7-strait-hormuz-is-closed-again-2026-04-19/