សម្តេចប៉ាប Leo លើកឡើងពីសារៈសំខាន់នៃតួនាទីរបស់អឺរ៉ុប ក្នុងការបញ្ចប់សង្រ្គាមអ៊ុយក្រែន

(រ៉ូម, អ៉ីតាលី)៖ សម្តេចប៉ាប Leo មានបន្ទូលថា អឺរ៉ុប ត្រូវតែដើរតួនាទីសំខាន់ ក្នុងកិច្ចខិតខំប្រឹងប្រែង ដើម្បីបញ្ចប់សង្រ្គាមនៅអ៊ុយក្រែន ដោយព្រមានថាផែនការសន្តិភាពណាមួយក្រៅពីអឺរ៉ុប គឺមិនប្រាកដនិយមទេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១០ ខែធ្នូ ឆ្នាំ ២០២៥។

សម្តេចប៉ាប បានអំពាវនាវដល់បណ្តាមេដឹកនាំអឺរ៉ុប ចាប់យកឱកាសធ្វើការរួមគ្នាដើម្បីសន្តិភាពដ៏ត្រឹមត្រូវ។ សម្តេចប៉ាប បានសង្កត់ធ្ងន់ថា «សង្រ្គាមនេះគឺនៅ​អឺរ៉ុប​។ ការ​ធានា​សន្តិសុខ​ត្រូវ​តែ​​ពាក់ព័ន្ធ​នឹង​អឺរ៉ុប។ ប្រទេសនៅអឺរ៉ុប ត្រូវជាផ្នែកមួយនៃការចរចាដើម្បីបញ្ចប់សង្គ្រាមជិត ៤ឆ្នាំមកនេះ»។

គួរបញ្ជាក់ថា សម្តេចប៉ាប បានជួបលោក វ៉ូឡូឌីមៀ ហ្សេលេនស្គី ប្រធានាធិបតីអ៊ុយក្រែន នៅក្នុងទីក្រុងរ៉ូម នៃប្រទេសអ៉ីតាលី ចំពេលមានសម្ពាធរបស់សហរដ្ឋអាមេរិក ឱ្យទទួលយកផែនការសន្តិភាព៕